د پاکستان تحريک انصاف د مشر عمران خان خور، عليمه خان، د جولای پر شلمه د خېبر پښتونخوا د سوات په بېلابېلو سيمو کې د ګوند له کارکنانو سره وليدل او هغوی ته يې ويناوې وکړې.
هغې په کبل، مټه، مينګوره او بريکوټ کې د ګوند له غړو سره غونډې وکړې. عليمه خان د مينګورې په سهراب خان چوک کې جلسې ته خپلې وينا كې وويل چې عمران خان ته په زندان کې د ناروغۍ پر مهال مناسب طبي اسانتياوې نه ورکول کېږي او د ګوند مشرانو ته هم له هغه سره د ملاقات اجازه هم نه ورکول کېږي.
هغې زياته كړه، عمران خان نه غواړي چې کارکنان اسلام اباد ډي چوک ته ورټول شي او حکومت پرې ډزې وکړي، ځکه هغه د خپلو کارکنانو د زيان رسېدو په حق كې نه دی.
عليمه خان پر کارکنانو زور راوړ چې عمران خان دې يوازې نه پرېږدي او د هغه د خوشې کېدو لپاره دې پر حکومت فشار زيات کړي.
د احتجاجي تحريک د اعلان په اړه هغې وويل، وروستۍ پرېکړه به د ګوند مشران کوي او زياته يې کړه چې د خېبر پښتونخوا وزيراعلی سهيل افريدي به د احتجاجونو او د اډياله زندان مخې ته د پرلت اعلان وکړي.
عليمه خان وويل، امکان شته چې حکومت به ډېر ژر هغه هم ګرفتار كړي، ځکه چې د ګوند د کارکنانو ترمنځ راوتلې ده.
د پاکستان تحريک انصاف مشر او پخوانی وزيراعظم عمران خان د ۲۰۲۳ کال د اګست له ۵مې نېټې راهيسې په زندان کې دی. هغه لومړی د توشه خانې په قضيه کې د سزا له امله ونيول شو، خو وروسته د القادر ټرسټ، د مې د نهمې پېښو او نورو مقدمو له امله هم په اډياله زندان کې بند پاتې شو. عمران خان او د هغه ګوند دا مقدمې سياسي بولي، خو حکومت او څارنوالۍ يې قانوني قضيې ګڼي.
