د امریکا هوايي ځواک نږدې دېرش کاله پخوانی یو فرضي راپور لا هم په انټرنېټ کې د دې دعوې لپاره خپرېږي چې ګنې امریکا د هوا او باران کنټرول کوي. خو د امریکا هوايي ځواک وايي، دا خبره سمه نه ده او راپور یوازې د راتلونکې په اړه یوه فرضي څېړنه وه.
دا راپور په ۱۹۹۶ کال کې د هوايي ځواک د “ایر یونیورسټي” له خوا خپور شوی و. دا راپور څو پوځي افسرانو لیکلی و، خو په هماغه راپور کې په ښکاره لیکل شوي چې دا یوازې د راتلونکو امکاناتو یوه فرضي مطالعه ده، نه د امریکا د حکومت یا هوايي ځواک رسمي تګلاره.
خو د “کیمیايي لیکو” پر نظریه باور لرونکي کسان همدا راپور د ثبوت په توګه وړاندې کوي او وايي چې حکومت د الوتکو له لارې هوا بدلوي.
د امریکا هوايي ځواک بیا وايي، دوی هېڅکله داسې پالیسي نه ده لرلې چې تر ۲۰۲۵ کال پورې دې هوا کنټرول کړي. د هوايي ځواک په وینا، د خلکو دا باور د همدې زاړه راپور د غلط فهم له امله جوړ شوی.
هوايي ځواک له دې مخکې هم په رسمي ډول ویلي وو چې د “کیمیايي لیکو” نظریه دروغ ده. د دوی په وینا، نه دوی د هوا د بدلولو کوم پروګرام لري او نه یې د پیلولو پلان شته.
په ۲۰۲۵ کال کې د امریکا د ملي سمندري او هوايي ادارې (اين او اى اى) یوه ساینسپوه هم وویل چې د “کیمیايي لیکو” د دې دعوې لپاره هېڅ ساینسي ثبوت نشته. خو بیا هم د امریکا په ځینو ایالتونو کې ځینو سیاستوالو د همدې نظریې پر بنسټ د قانون وړاندیزونه کړي دي.
دا بحث هغه وخت یو ځل بیا تود شو، کله چې د امریکا د روغتیا وزیر رابرټ ایف کینیډي جونیر په یوه ټلوېزیوني مرکه کې وویل چې د الوتکو تر شا پاتې کېدونکې لیکې ښايي د الوتکو د تېلو له موادو سره تړاو ولري. هغه د امریکا د پرمختللو دفاعي پروژو ادارې (ډي اى ار پي اى) نوم هم یاد کړ.
خو ساینسپوهان دا خبره نه مني. د هارورډ پوهنتون د څېړونکو یوې ډلې، د ډېوېډ کیت په مشرۍ، ویلي چې تر اوسه داسې هېڅ باوري ثبوت نه دی موندل شوی چې د “کیمیايي لیکو” په نوم کوم پټ پروګرام روان وي.
