د امریکا اولسمشر ډونلډ ټرمپ ویلي، امریکا به د ایران کنګل شوې شتمنۍ د هغو بېړیو او بارونو د تاوان پوره کولو د پاره استعمال کړي کومې چې د خلیج په سیمه او شاوخوا کې د بریدونو له امله زیانمن شوي دي.
د ټولنیزو رسنیو ټروت سوشل په پاڼه په ۲۴مه جولایي ټرمپ لیکلي: «تر بلې خبرتیا پورې دې دا اعلان رسمي وګڼل شي، له نن وروسته به بېړیو، بارونو او له دې سره تړلو هر ډول تاوان د ایران له هغو پیسو ورکول کېږي چې د امریکا په واک او کنټرول کې دي.»
ټرمپ دا نه ده په ډاګه کړې چې دا پیسې به له کومې ځانګړې سرچینې اخلي، خو د امریکا د بندیزونو له امله د ایران په اربونو ډالره شتمنۍ یا خو کنګل شوې او یا هم د امریکا تر واک لاندې پرتې دي.
بل پلو ته د ایران د خارجه چارو وزیر سید عباس عراقچي د ډونالډ ټرمپ د بیان غبرګون کې په خپلې ایکس پاڼې لیکلي دي :د بل هېواد شتمني نیول او د هغې پیسې د داسې راتلونکو دعوو د ادا کولو لپاره کارول چې ورسره هېڅ تړاو نه لري، یو ډېر خطرناک او پاروونکی مثال جوړوي.
څوک چې د دغو پیسو په کارولو خوشحالي کوي یا ترې ګټه اخلي، باید دا خبره په یاد وساتي: که حکومتونه د نورو شتمنۍ ضبطول یو عادي کار وګرځوي، نو بیا د هېچا شتمني خوندي نه پاتې کېږي. د دې کار له امله چې کوم ګډوډی راولاړېږي، هغه به نه ښکلې وي او نه به سوله ییزه وي.”
