د امريکا د بهرنيو چارو وزير مارکو روبيو ويلي، که ايران يا د هغه ملاتړ کوونکې ډلې د امريکا پر ځواکونو، سفارتونو يا نورو ګټو بريدونه وکړي، نو تهران به يې “بيه پرې کوي.”
روبيو دا څرګندونې له خبريالانو سره د خبرو پر مهال وکړې. له هغه وپوښتل شول چې ايا امريکا د ايران پر ضد نور پوځي ګامونه هم اخيستلی شي؟ نوموړي په ځواب کې وويل، امريکا جګړه نه غواړي، خو د خپلو ځواکونو او ملي ګټو د خونديتوب لپاره به هر اړين اقدام وکړي.
هغه زياته کړه چې واشنګټن غواړي په سيمه کې تاوتريخوالی نور زيات نه شي، خو که امريکايي وګړي، پوځيان يا نورې ګټې په نښه شي، نو مناسب او سخت ځواب به ورکړل شي.
دا څرګندونې په داسې وخت کې شوې چې په منځني ختيځ کې د امريکا او ايران ترمنځ کړکېچ يو ځل بيا زيات شوی دی. په وروستيو اوونيو کې په عراق، سوريه او د سيمې په نورو ځايونو کې د امريکايي اډو پر ضد د راکټونو او ډرون بريدونو راپورونه هم ورکړل شوي دي.
ايران تل ويلي چې د سيمې د وسله والو ډلو خپلواکې پرېکړې کوي او تهران د هغوی د هر اقدام مسؤل نه دی. خو امريکا وايي، ايران د دغو ډلو ملاتړ کوي او د هر ډول بريد مسؤليت به هم ور تر غاړې وي.
کارپوهان وايي، که د دواړو هېوادونو ترمنځ تاوتريخوالی همداسې دوام وکړي، نو د منځني ختيځ امنيتي وضعيت به نور هم خراب شي او د سيمې پر اقتصاد او نړيوالو انرژۍ بازارونو به هم اغېز وکړي.
