د برتانيې راتلونکي صدراعظم انډي برنهم ويلي دي چې د کارکوونکو لپاره د ډيجيټل شناختي کارډ منصوبه به ختمه کړي. ټاکل شوې ده چې هغه د جولای په ۲۰مه د کير سټارمر پر ځای وزيراعظم شي.
دا منصوبه په اصل کې د غيرقانوني کډوالو او ناقانونه کار د مخنيوي لپاره جوړه شوې وه، خو د پارلمان يوې ګډې کمېټې ويلي وو چې د دې تياری سم نه دی شوی. کير سټارمر هم د روان کال په جنورۍ کې د دې منصوبې لازمي شرط نرم کړی و.
د برتانيې د بودجې د مسؤليت دفتر اټکل کړی و چې په دې نظام به د ۲۰۲۶–۲۷ نه تر ۲۰۲۸–۲۹ مالي کلونو پورې شاوخوا ۱.۸ ميليارده پونډه لګښت راځي. د برنهم نږدې ملګري وايي، دا پيسې به اوس د ګرانۍ د کمولو او د خلکو د ژوند د خرڅونو د راکمولو پروګرامونو ته ورکړل شي.
بلخوا محافظه کار ګوند پر ليبر ګوند نيوکه کړې او ويلي يې دي چې پر دې نيمګړې منصوبه يې د خلکو وخت او پيسې ضايع کړې دي. د نوي بديل پلان بشپړ تفصيلات لا نه دي خپاره شوي.
د دې پرېکړې وروسته سياسي غبرګونونه هم مخې ته راغلي دي. د لبرل ډيموکراټ ګوند غړې ليزا سمارټ دا پرېکړه د خلکو لپاره لويه ګټه بللې او ويلي يې دي چې اوس به خلک خوشحاله وي، ځکه نور به مجبور نه وي چې د خپل ورځني ژوند لپاره شخصي معلومات حکومت ته وسپاري. د شخصي معلوماتو د خونديتوب ادارې “بيګ بروتر واچ“ هم د دې پرېکړې ملاتړ کړی او ويلي يې دي چې خلکو له پخوا نه ويل چې اجباري شناختي کارډ نه غواړي.
خو محافظه کار ګوند بيا دا پرېکړه سياسي لوبه بولي. د ګوند غړې جوليا لوپيز ويلي، برنهم دې روښانه کړي چې په حقيقت کې کومه منصوبه ختموي. د هغوی په وينا، ليبر ګوند لا له وړاندې په دې ناکامه منصوبه د خلکو وخت او پيسې ضايع کړې دي.
