د امريکا مرکزي قوماندې (سينټکام) په اېکس پاڼه د جولاي په اتلسمه سهار ليکلي، ځواکونو يېد جولاي په ۱۷مه د شپې په ايران د اوومې پرله پسې شپې بريدونه پاي ته رسولي.
دوي زياته کړې چې د امريکا ځواکونو د ايران د څارنې ځايونه، د پوځي لاجسټکي انفراسټرکچر، د ځمکې لاندې د وسلو زيرمې او سمندري وړتياوې په نښه کړې دي.
سينټکام وايي چې د امريکا ځواکونو د نورو شتمنيو سربيره جنګي الوتکې، هوايي ډرونونه او جنګي کشتۍ هم کارولي.
بلخوا د ايران سرکاري خبري ايجنسۍ ارنا د خپل اېکس پاڼې د لارې د جولاي په اتلسمه ليکلي، د ايران پوځونو په اردن کې د امريکا تاسيسات په نښه کړي.
د ايران د پاسداران انقلاب اسلامي ځواک په اېکس پاڼه د جولاي په اتلسمه سهار يو خبر ورکړى، چې پکې يې ليکلي، ايراني ميزايلونو په سعودي عرب کې د امريکا يوه اډه/بيس په نښه کړى.
د پاسداران انقلاب اسلامي ځواک په اېکس پاڼه دا هم ليکلي، چې ايران به متحده عرب امارات، سعودي عرب، کويت، بحرېن او د قطر په شمول ټول هغه ځايونه په نښه کوي، چرته چې د امريکا زيربناوې/انفراسټرکچر موجود دي.
د ايران يوې بلې خبري ايجنسۍ تسنيم هم د جولاي په اتلسمه سهار خپل يو خبر کې ليکلي، د امريکا بريدونو د ايران د مکران په ساحل کې د سمندري ترېفيک څارنې برج ويجاړ کړى.
خبري ايجنسۍ تسنيم په يو بل خبر کې بيا هغلته د انساني زيانونو معلومات شريک کړي، چې پکې يې ويلي، د امريکا په وروستيو بريدونو کې ۳۸ ايرانيان وژل شوي دي.
تسنيم د ايران د روغتيا د عامه اړيکو او معلوماتو د مرکز د مشر يو بيان جاري کړى چې پکې يې ليکلي، د امريکا په بريدونو کې د زخميانو شميره ۴۰۰ څخه اوښتې.
ياده دې وي چې د امريکا تازه بريدونه هغه وخت شروع شو، چې څو ورځې وړاندې د هرمز تنګي په سمندري لار کې ايران ځينې کاروباري کشتۍ په نښه کړې وې. ايران ويلي وو، دغه کشتيو د ايران نه په دغه اوبو کې د تيريدو اجازت نه و اخيستى.
امريکا بيا ويلي وو، په هرمز تنګي تيريدونکې کشتيو ته د ايران د اجازت ضرورت نشته، او ځواکونو يې د هرمز تنګي ناکه بندي شروع کړې وه.
د امريکا او ايران ترمنځ د سولې او ثبات لپاره تيره مياشت په اسلام اباد کې د خبرو اترو لومړې پړاو شوى و، چې له هغې وروستو د پاکستان په کوربه توب کې په سويټزرلينډ کې د دواړو هېوادونو ترمنځه لوظنامه هم لاس ليک شوې وه.
په هغه لوظنامه د امريکا ولسمشر ډونالډ ټرمپ، د ايران ولسمشر مسعود پزشکيان د فريقونو په حيثيت او د پاکستان لومړي وزير/وزيراعظم شهباز شريف د منځه ګړي/ثالت په حيثيت سره دستخطونه کړي وو.
