انګلینډ د هند پر وړاندې د شلاووریزو (ټي۲۰) سیریز په درېیمه لوبه کې هند ته ستره ماته ورکړه او په سیریز کې یې خپله برلاسي لا پیاوړې کړه. په دې سیریز کې د هند درنه ماته د بحث مهمه موضوع وه، خو د هند د ځوان لوبغاړي ویبهو سوریه ونشي ریکارډي نړیواله پېللوبه (ډیبیو) هم د مینهوالو پام ځان ته واړاوه.
د ناټینګهم په لوبغالي کې د سیریز په درېیمه لوبه کې انګلینډ لومړی بیټنګ وکړ او په ۲۰ اوورونو کې یې د اوو لوبغاړو په سوځېدو ۲۰۱ منډې جوړې کړې. د ۲۰۲ منډو هدف په تعقیب کې د هند ټوله لوبډله یوازې په ۷۶ منډو وسوځېده او د ۱۲۵ منډو په لوی توپیر یې ماته وخوړه. دا د شلاووریز نړیوال کرکټ په تاریخ کې د منډو له پلوه د هند تر ټولو ستره ماتې بلل کېږي. له دې بریا سره انګلینډ د پنځو لوبو په سیریز کې ۲-۰ مخکښ شو.
د سیریز لومړۍ لوبه د باران له امله بې پایلې پای ته رسېدلې وه، خو په دوهمه لوبه کې انګلینډ هند ته د څلورو ویکټو په توپیر ماته ورکړې وه او د سیریز مشري یې ترلاسه کړې وه.
بل لور ته، د مانچسټر د اولډ ټرافورډ په لوبغالي کې د سیریز په دوهمه لوبه کې د هند ځوان توپوهونکي ویبهو سوریه ونشي په نړیوال کرکټ کې خپله لومړۍ لوبه وکړه او نوی ریکارډ یې جوړ کړ. هغه په ۱۵ کلنۍ او ۹۹ ورځنۍ عمر کې نړیوال کرکټ ته داخل شو او د هند د تاریخ تر ټولو کمعمره نړیوال لوبغاړی شو.
تر دې مخکې دا ریکارډ د هند له پخواني ستوري سچن ټنډولکر سره و، چې په ۱۹۸۹ کال کې یې د پاکستان پر وړاندې په کراچۍ کې په ۱۶ کلنۍ او ۲۰۵ ورځنۍ عمر نړیواله پیللوبه کړې وه. ویبهو سوریه ونشي دا ریکارډ مات کړ او د نړۍ د تر ټولو کمعمره نړیوالو پېلکوونکو لوبغاړو په نوملړ کې دوهم مقام ته ورسېد.
په دې نوملړ کې لومړی ځای د پاکستان د پخواني توپوهونکي حسن رضا دی، چې په ۱۹۹۶ کال کې یې په فیصلاباد کې په ۱۴ کلنۍ او ۲۲۷ ورځنۍ عمر نړیواله لوبه کړې وه. درېیم ځای د بنګلهدېش محمد شریف لري، چې په ۲۰۰۱ کال کې یې په هرارې کې په ۱۵ کلنۍ او ۱۱۶ ورځنۍ عمر نړیوال کرکټ پیل کړی و.
د پاکستان مشتاق محمد او عاقب جاوېد او د هند سچن ټنډولکر هم د نړۍ د کمعمره نړیوالو لوبغاړو په دې مهم نوملړ کې شامل دي.
ویبهو سوریه ونشي په خپله لومړۍ نړیواله لوبه کې له ابھیشیک شرما سره د پاڼۍ پېل وکړ. دواړو په ۲۹ توپونو ۵۰ منډې جوړې کړې. نوموړي په ۱۰ توپونو ۱۴ منډې وکړې چې دوه شپږیزې هم پکې شاملې وې، خو وروسته وسوځېد.
په همدې لوبه کې هند لومړی بیټنګ وکړ او په ۲۰ اوورونو کې یې د اوو لوبغاړو په سوځېدو ۱۹۰ منډې جوړې کړې، خو انګلینډ ټاکل شوی هدف په ۱۹ اوورونو کې د شپږو ویکټو په زیان پوره کړ او بریا یې خپله کړه.
