د اورکزيو ډپټي کمشنر عرفان الدين د خپل دفتر په رسمي فېسبک پاڼه خپور شوي خبر کې ويلې دي چې د جون پر ۱۸مه نېټه د فېروز خېلو سيمې په ميربک هديرې کې د يو مړي خاورو ته ورسپارلو رسومات روان وو چې دې مهال پرې د اسماني بجلۍ تندر را پرېوتو چې پکې درې کسان مړه او څلور ژوبل شوي دي۔
په پېښه کې ژوبل کسان د کلايې هسپتال ته رسول شوي دي چې د روغتون ډاکټرانو له طرفه يې حالت له خطره بهر ښودل شوی دی۔
ډپټي کمشنر په خپله فېسبوک پاڼه ليکلي چې د پېښې نه وروسته د انتظامي او د پوليسو ځايي مشران هسپتال ته ورغلي او د ژوبل کسانو سره يې مرستې هم روانې دي۔
