په سوات کې ناپېژاندو وسله والو پر ځايي ټرانسپورټر افضل ګوجر ډزې کړې، چې پکې د ټرانسپورټر زوی او وراره په ګډون درې تنه وژل شوي او خپله افضل ګوجر ټپي شوی دی ۔
د سوات د پوليسو وياند ناصر اقبال کريمي او ځايي اوسېدونکو په وينا، د بر سوات د شکردرې په سيمه کې د جون په پينځمه د مټې يو ځايي ټرانسپورټر افضل ګوجر د شپې ناوخته هغه مهال تر بريد لاندې راغی، کله چې د مينګورې نه په ګاډي کې خپل کور مټې ته روان و ۔ د ځايي خلکو په وينا، ډزې تر شاوخوا يو ساعت پورې روانې وې او د درنو وسلو د چاودنو غږونه هم اورېدل کېدل ۔
په بريد کې د افضل ګوجر ځوان زوی بهرام خان او د هغه وراره وژل شوي دي ۔ د ډزو په پېښه کې د دوی يو ساتونکی هم وژل شوی دی ۔ افضل ګوجر ټپي شوی او د درملنې لپاره د مټې روغتون ته لېږدول شوی دی ۔
د سوات د پوليسو مشر (ډي پي او) محمد عمر خان رسنيو ته ويلي، چې سيمې ته په ګڼ شمير کې پوليس استول شوي او د بريدګرو پر ضد عمليات پيل شوي دي ۔
بل لور ته، د پېښې له رامينځ ته کېدو وروستو د سهار لخوا د افضل ګوجر د زوي او نورو وژل شويو کسانو مړي د احتجاج په توګه د شکردرې پر مرکزي سړک اېښودل شوي او لاره تړل شوې ده ۔ احتجاج کوونکي د بريدګرو د نيولو غوښتنه کوي ۔
د دې بريد مسئوليت تر اوسه کومې ډلې يا چا پر غاړه نه دی اخيستی۔
