د جاپان د کوماموتو ولایت په یوه پیشو کیفه (موف كيټ كيفى) كې د زلزلې له وجې راګیرې شوې ټولې ۲۵ پیشوګانې په خوندي ډول ژغورل شوې دي.
د راپورونو ترمخه، د جولای په ۲۸مه په سیمه کې د ۷.۱ درجې زوروره زلزله وشوه چې د ایون مال ودانۍ ته یې سخت زیان ورساوه. په دې پېښه کې لږ تر لږه درې کسان مړه او ګڼ نور ژوبل شول. د زلزلې نه لږ وخت وروسته په ودانۍ کې یوه چاودنه هم وشوه، چې چارواکي یې د ګاز د لیکېدو نتیجه بولي.
د زلزلې او چاودنې له امله د پیشو کیفې ټولې ۲۵ پیشوګانې د مال دننه راګیرې شوې او څوک یې بهر نه شوې ایستلی.
وروسته چې د اور وژنې ادارې، پولیسو او د مال انتظامیې اجازه ورکړه، د کیفې مدیر ودانۍ ته دننه لاړ او د شاوخوا شپږ ساعتونو عملیاتو وروسته یې ټولې ۲۵ پیشوګانې په خوندي ډول راویستې. د کیفې د انتظامیې په وینا، هېڅ یوه پیشو ژوبله شوې نه وه.
وروسته دغه ټولې پیشوګانې د همدې شرکت یوې بلې څانګې ته، چې د هیروشیما ښار کې ده، ولېږدول شوې. د کیفې کارکوونکو وویل چې د اوږد سفر له امله یې د پیشوګانو د ستړیا اندېښنه لرله، خو هلته له رسېدو وروسته هرې یوې ته جلا پاملرنه او معاینه وشوه.
