اېکواډور د فټبال نړيوال جام په ګروپي پړاو کې جرمني ته په ۲-۱ ماتې ورکړه او د ۲۰۰۶ کال وروسته يې د لومړي ځل لپاره د سياليو ناکاوټ يا ۳۲ غوره لوبډلو پړاو ته لاره پيدا کړه۔
لوبه د امريکا د نيوجرسي ايالت په ايسټ ردرفورډ ښار کې ترسره شوه۔
جرمني د لوبې په دوهمه دقيقه کې د ليروی ساني په ګول برتري تر لاسه کړه، خو اېکواډور يوازې پنځه دقيقې وروسته د نيلسن انګولو په ښکلي ګول لوبه يو ـ يو مساوي کړه۔
د لومړۍ نيمايي تر پای پورې دواړو لوبډلو هڅې وکړې، خو نور ګول ونه لګېد او لوبه د ۱-۱ په نتيجه روانه وه۔
د دوهمې نيمايي له پيل سره سم جرمني ته د پنالټۍ موقع په لاس ورغله، خو د ويډيو اسسټنټ ريفري له کتنې وروسته دا پرېکړه بېرته واخيستل شوه، ځکه د بريد له پيل وړاندې د جرمني د لوبغاړي له خوا فاول شوی و۔
اېکواډور د لوبې په ۷۷مه دقيقه کې بريالی ګول وکړ۔ ګونزالو پلاټا د جرمني د دفاع له تېروتنې ګټه واخيسته او توپ يې د ګول ساتونکي مانويل نويېر له مخې جال ته ولېږه۔
د دې بريا سره اېکواډور د ګروپ له دوهم مقام څخه بل پړاو ته ووت، په داسې حال کې چې جرمني د ګولونو د ښه توپير له امله د ګروپ د سر لوبډلې په توګه هم ناکاوټ پړاو ته لار پيدا کړه۔
اېکواډور وروستی ځل په ۲۰۰۶ کال کې د نړيوال جام دوهم پړاو ته رسېدلی و، او دا ځل يې له شلو کلونو وروسته يو ځل بيا دغه بريا تکرار کړه۔
په همدې ګروپ کې د عاج ساحل (ايووري کوسټ) لوبډلې هم کوراساو ته ۱-۰ ماتې ورکړه، خو د بل پړاو لپاره د اېکواډور او جرمني لوبډلې بريالۍ شوې۔
